Harowo.com

Faallo: Maxaa Keenay in Amaal X. Miisaan Dhex Cararto Xafiiska Deeqaha S/land? Ma Xiinkeeda Ayay Ka Dheeraynaysaa, Mise Madaxtooyada Ayaa Ku Gabraaranaysa??

Wax yar ka dib markii uu madaxwene Siilaanyo talada dalka la wareegay, ayaa wuxuu Amaal Xaaji Miisaan, oo xubin firfircoon ka ahayd Kulmiya Awdal u magacaabay inay noqoto la talalihiisa arrimaha haweenka Somaliland. Fir-fircoonideeda arrimaha xisbiga Kulmiye ka sokow, Amaal laguma aqoon inay khibrad dheeraad ah u leedahay arrimaha haweenka, waxaana dad badani markiiba su’aalo iska weydiiyeen inuu xilkani dhab yahay iyo inkale maadaama oo uu xilkani u baahan yahay aqoon ka baxsan olole doorasho iyo firfircooni xisbi.

Lataliyaha madaxweynaha ee arrimaha haweenku, waa xil aad u culus hadii xukuumaddu meeqaamka uu leeyahay siiso, waxaanu u baahaan yahay karti iyo hufnaan badan, isla markaana waa inuu masuulka loo igmaday leeyahay aqoon dhinaca akaadamiyada ah, waayo aragnimo iyo shakhsiyad wadaninimo ku dheehan tahay, oo ka fog anshi xumo iyo qabyaalad. Waxa kale oo muhiim ah inuu ruuxa loo doortaa dalka iyo dadkana kala yaqaano, ajanda u hooseeyaana jirin. Halakan laguma soo koobi karo muhiimada ay leedahay horumarka iyo daryeelka haweenka Somaliyeed, waayo waa Udub dhexaadka nolosha bulshada Soomaalida.

Hadaba, Amaal oo xilkan lataliyaha madaxweynaha ee arrimaha haweenka haysay mudo haatan labo sano ku dhaw, ayaan la arag iyada oo ka hadlaysaa dhibaatada iyo waxyaabaha kale ee khuseeyaha haweenka Somaliland, waxase la arkaa uun iyada oo dhex taagaan meel raashin iyo deeq banaanka ka timid lagu qaybinayo, taasoo marka runta laga hadlo ka baxsan xilka sida rasmiga ah loogu magacaabay, waxaana isweydiin mudan sabobta ay Amaal X. Miisaan xilkii loo igmaday u gudan laadahay ee ay u dhex cararayso hawlo aan loo diran, meeshaas sow far kuma godna?

Sida la ogyahay Madaxa xafiiska samaflka ee madaxtooyada Somaliland waa Amina Maxamed Diiriye (Amina Buuro), taaso sida la sheegay ah xubin aqoon iyo waayo argnimo u leh arrimaha samaflka, hase yeeshe ay Amaal X. Miisaan sida ka muuqata ay shaqadeedii cidhiidhsanayso. Warar aan ka helnay ilo wareedyo u dhuun daloola arrimaha samafka iyo deeqaha, ayaa sheegaya in labada masuul uu xidhiidka u dhexeeyaa hada aad u xumaaday, ka dib markii ay Aamina Burco ku wargalisay Amaal X. Miisaan inay faraha ka baxdo arrimaha samo falka ee ay dhex cararyso, taasi oo Amaal diiday, waxaanay sida la sheegay ku faantay inay adagtahay sida looga saaro arrimaha samofalka maadaama oo ay xadhko adadag haysato, taasoo loo macnaystay inay ula jeedo inay dhaqdhaqaaqeeda ka dambayso Aamina Waris, oo ah marwada madaxweynaha Somaliland.

Markii ay Amaal diiday inay faraha kala baxdo arrimaha xafiiska samofalka, ayaa waxay Amina Maxamed Diiriye (madax xafiista samofalka ee madaxtooyada Somaliland), ku dacwootay wasiirka madaxtooyada Xirsi Gab, iyada oo Xirsi ku wargalisay hadii “Gabadhan yar ee badawada ah ee tuulo joogta ah laga qaban waayo inay xilka iska casili doonto.” Lamo oga ilaa hada wax ka soo baxay dacwadaa ay Aamina Burco ka gudbisay Amaal.

Wali lama arag meel raashin ama wax kale lagu qaybinayo oo ay Amaal Xaaji Miisaan Ka Maqan tahay, taasina waxay keentay in dad badan yaab iyo fajac ku noqotay waxa gabadhan dabo dhigay qarafada yar ee caalunku dhawrto ahaan ugu soo diraan dadka tabaalaysan ee Somaliland.

Sidoo kale, ayay wararkani tibaaxayaan Cabdiraxmaan Saylici iyo xildhibaandii Sunaamiga ee Maxaad Case, inay iyagun Xirsi gaab kaga dacwoodeen Amaal X. Miisaan, iyaga oo ka cabanaya Amaal oo deeqaha la keeno Awdal waxna iibbisa inta kalena qabyaalad ku qaybisa.

Dhinaca kale, waxa xafiiska samofalka ee madaxtooyada Somaliland ee gobolka Awdal uga wakiil ah gabadh la yidhaahdo Ayaan Cali Cumar, taasoo iyada nafteedu dhib weyn ku qabta doorka ay Amaal Xaaji Miisaan ka qaadato sida loo farsameeyo iyo sida loo qaybiyo wixii samofal ah ee gobolka soo gaadha.

Ayaan Cali Cumar, ayaa sida la sheegay ka dambaysay cabashadii iyo qaylo dhaantii dhawaan kasoo yeedhay odayada degeenada galbeedka Boorama, kuwaas oo iyaga oo baahan maalin walba hortooda lagu iibiyo qarafadii caalamku u soo fidiyay. Cabshadan, ayaa sida la sheegay waxa si toos ah loogu durayay Amaal X. Miisaan, taas oo loola jeeday qabyaalada ay ka wado gobolka Awdal. Amaal ayaa deeqaha gobolka soo gaadha inta ay gadato maahine, inta kale qabyaalad ku qaybsisa.

Sidoo kale, ayaa waxa hada Amaal Xaaji Miisan ka cabanaya, oo arrimaheedana Hargeysa ugu jooga taliyaha qaybta ee bilayska Boorama Mr. Araweelo. Taliyaha qaybta ayaa amar uu bixiyay lagu qabtay labadii gaadhi ee siday Huu Dhaydhkii deeqda ahaa ee la xaday, kuwaas oo la geeyay saldhiga bariga Boorama. Labada gaadhi, ayaa markii ay labo casho yaaleen saldhiga ay Amaal X. Miisaan oo adeegsanaysa awooda marwada Siilaanyo Aamina Waris, xoog kaga soo saartay saldhifa, iyada oo sida la sheegay taliyaha qaybtana ku tidhi “Hiroo”, taasoo uu taliyihu aad uga xanaaqay.

Hadaba, waxa la isweydiin karaa Amaal Xaaji Miisaan oo shaqadii loo igmadayba gabtay, xagay ka keentay awoodahan ay ku bahdilayso waxaas oo dad ah oo kala duwan, gaar ahaana madaxa xafiiska samofalka Amina Maxamed Diiriye (Amina Buuro), Ayaan Cali Cumar oo ah Isu Duwaha Xafiiska Smafalka Madaxtooyada Gobolka Awdal, Saylici, xidhibaanada Sunaamiga iyo taliyaha qaybta ee bilayska Boorama.

Wararka la isla dhexmarayo magaalada Boorama, kuwaas oo sida la sheegay laga soo wariyay Amaal Xaaji Miisan, ayaa sheegay inay Amaal had iyo jeer ku faanto inay kartideeda iyo lacagta ay Aamina Waris u geenayso ay meesha ku joogto, cid kalena aanay abaal ugu qabin. Hadalka Amaal ayaa waxa kuu cadaaynaysa inuu run yahay mar hadii ay ku hawlan tahay musumaasuq iyo xatooyo xoolo dadweynane, dadkii ka cabanayayna la dhegaysan laayahay, inay wax ka jiraan faanka Amaal.

Ugu dambayn waa in madaxtooyada Somaliland ogaataa in qaabkan loo adeegsanayo Amaal Xaaji Miisaan xasarad iyo fadeexad mooyaane manfac kale u soo kordhin doonin. Qadarka lacagta ah ee kasoo baxda Huu Dhaydh masaakiin loogu talo oo la gataana aanu meel fog ku gaadhsiinayn. Haday la ogyihiin iyo hadii kaleba, xidhiidhka Amaal Xaaji Miisaan waa bar madow oo ku taal madaxtooyada Somaliland, gaar ahaana Aamina Waris oo sida ay Amaal ku Faanto ay iyada u adeegto.

Harowo Desk, Boorama


This post has been viewed 1019 times.

camud

1 Comment for “Faallo: Maxaa Keenay in Amaal X. Miisaan Dhex Cararto Xafiiska Deeqaha S/land? Ma Xiinkeeda Ayay Ka Dheeraynaysaa, Mise Madaxtooyada Ayaa Ku Gabraaranaysa??”

Leave a Reply

WARARKII HORE EE KU DHAAFAY HALKAN KA RAADI
Log in | onlined by SRH