Harowo.com

Xaqii baa yimid dulmigiina albaabka ayuu ka baxay.

Jaa’al Xaq Wasahaqal Baadil Inal Baadila Kaana Sahuuqaa. By: Abdirisaq Mohamed Barkhad

“Allaahu Akbar Allaahu Akbar Allaahu Akbar Walilaahil Xamdu”

Waxaan marka hore u duceynayaa in uu Illaahey naxariista Janno ka waraabiyo Mujaahid Jimcaale iyo inta kale ee maanta u geeriyootey qadiyada guud ee Gadabuursi waxaa kale oo aan Illaahey caafimaad sareecana u weydiinayaa in uu shaafiyo dadkii uu dhaawucu ka soo gaadhey muujinta shucuurtooda ay ku ayidayeen rabitaankooda iyo waxa ay xaqa u leeyihiin oo dhan waxaanan dadkaasi leeyahay Asalukalaahul Cadiim Rabbul Carshil Cadiim Anyashfiikum, Asalukalaahul Cadiim Rabbul Carshil Cadiim Anyashfiikum,
Asalukalaahul Cadiim Rabbul Carshil Cadiim Anyashfiikum.

Allaa-mansur ikhwaananna fi Saylac, fi Borama aw fi kuli makaanu ardul ADAL aamiin aamiin aamiin.

Maanta waa maalin weyn oo farxad ballaadhan mudan waa maalin xaqu guuleystey oo ay guuldareysteen intii xumaanta maleegeysey waa maalin ay midnimada Beelaha Gadabuursi wannaag iyo ray ray la waabariisatey waa maalin aan la qiyaasi karin qiimaha ay ku leeyahay dadka ku abtirsada Boqortooyadii ADAL waa maalin ay dhaar xalaal ah bishaareysteen tobbonka Xildhibaan ee mubashiriinta ah waa maalin ay dhuumanayaan dhuuni qaatayaashii dadkooda u soo badheedhey in ay iibsadaan waa maalin ay niyadoodu naxliga iyo cabsidu naafeysey ay naawileyso ayaan darro waa maalin saddex wiig iyo maalmo haddaan sooryo cuni weyno safrad aan lanooga yaabin oo sarina meyso naftayadu.

Waxaan u mahadcelinayaa qof kasta oo u sara joogsadey qadiyaddaas Saylac ee la rabbey in lagu xalaaleysto sidda xaaraanta ah waxaa ammaan aan duugoobin maanta mudan kuwa dhiigoodii hurey iyo kuwa shucuurtoodii ku muujiyey dhaawac iyo dhibaato soo gaadhey kuwaasi oo heegan u galley in ayna suurto gelin dibin daabyadda ay soo maleegeen daba dhilifku waxaa gabbonimo sannadkan cusub la kawsatey kalmadihii isku midka ahaa ee milgaha iyo sharafta ku shaqlanaa ee ay jeediyeen Salaadiinta iyo Waxgaradka reer Awdal kuwaasi oo muujiyey midnimada iyo muwaafaqada dhexdooda ah ee ku jiheysan arrinta Saylac in ay ka adag tahay bir xadiid ah oo kale.

Waxaan Cambaareynayaa daalimiintii soo duuley ee sharka iyo xumaanta la soo doontey dadweynaha ku nool magaalada Borama waxaan Illaahey ka badyeynaa in fidma wadayaashaas dhallaanka reer Awdal dhiigoodii billaashka ku daadiyey in Illaahey naarta ku fogeeyo waxey ahaayeen ragg billaa damiir ah oo garaad madhan la soo guura galley waxey ahaayeen ragg aan garaneyn darisnimo waddaaga ay diinteena macaan ammaantey waxey ahaayeen ragg xummaan u soo xadhko xidhey oo af xumo u soo badheedhey waxey ahaayeen fido wadayaal aan jixin jixeyn oo jaajuusnimo ay aragti u aheyd waxey ahaayeen dad ka aradan wannaaga iyo Islaamnimada oo billaa istijo kaga soo baxey Hargeysa waxey ahayeen ragg ku mammey dhiiga dhalaanka yar yar soo koraya waxey ahaayeen caadaqaataal Illaahey iyo ummaadiisuba nacdashey waxey ahaayeen ragg aan maalinta qiyaame wax khayr ah oo ka horeeyaa aannu jirin iyaguna aaney rajeyneyn in ay Janno jaaheeda arkaan.

Waxaa maanta sharaf iyo gobbonimo ku shahiidey waxgaradka garaadka foyow leh ee u quus gooyey xumaantii u qarsooneyd Allaahu Akbar Allaahu Akbar Allaahu Akbar Walilaahil Xamdu, Salaadiinta reer Awdal way ka ilbaxeen wakhtigii Waxbarashada nabada way ka qalin jabiyeen wakhtigii Kuliyada illaalinta Dastuurka reereysan way ka talaabsadeen cashiradii mala-awaalka ahaa ee ay ka mid tahay maadadda ku magac dheer gabtii dhistey Somaliland baad tihiin waxaas oo dhan waa wax Illaahey loogu mahad naqo waa wax loo tukado salaatal shukri waa wax Illaahey laga baryo in uu ummaddan dulman ee dhiigoodii la xalaashadey u sii siyaadiyo midnimada iyo tallo-waddaaga wananagsan.

Sidda aan la socono wax kastiba dhaqan baa sal dhig u ah maanta hoggaamiyayaasha dhaqanka ee beelaha Gadabuursi waxaa la gudboon in ay ambo-qaadka midnimada halkaas ka sii waddaan oo ay waddaagaan tallo waddaag joogto ah oo ay iska illaaliyaan wax kasta oo wadda jirkooda fur-furaya waa in ay shir guud sidda ugu deg dega badan ku qabsadaan magaalada Saylac ee ay ku duugan tahay taariikhda facaweyn leh ee awoowyaasheen AUN Illaahey ha inoo quweeyo midnimadda billowgeeda iyo macaankeeda maanta aan dhadhaminey Illaahey ha ina dhaafiyo sharwadayaasha dabinada qarsoon dadkeena iyo deegaanadeena la maagan Illaahey tolkaas ballaadhan bogooda burcad iyo barako kheyr leh ha isku mariyo kuwii is indho buuxiya ee cadawgooda ill aragtideedu mideysan kuwadda eega Allaha idinka yeello waa dardaaran laqiman waa daawada mustaqbalkeena waa darajada iyo rajadda iftiinka aan naawileyno in aan maalin maalmaha ka mid ah gaadhno Allaahu Akbar Allaahu Akbar Allaahu Akbar Walilaahil Xamdu.

Dadka qurba jooga ah ee reer Awdal meel kasta ha joogaane waxa looga baahan yahay in ay cabsida iska daayaan oo ay ummaddooda wixii wannaagooda iyo horumarkoodu ku jiro ugu hiiliyaan waan ogsoonahay in arrintan ay niyada ka wadda taageersanaayeen oo ay jiif iyo joogba la joogi kari la’aayeen laakiin indhaheenu may qaban dad inta ay isa soo urursadeen tallo mideysan oo wax ku ool ah tolkoodii gudaha joogey u gudbinaya taasi waa dhaliil waa cannaan waa wax aan la idinka sugeyn oo aan sannadahan lagu jiro la idiinka fadhiyin laakiin waxaad wali haysataan fursad aad dadkiina ugu horseedi kartaan ka qeyb galka wajigan cusub ee u waabariistey.

Waxaad ogsoonaataan arrintani in ay maanta keeni doonto waxyaabo badan oo cidhiidhi ah maadaama awoodo waa weyn kala daadinteena loo isticmaaley Illaahey xaqii u hiiliyey ee fekradii baadilka aheyd dhulka ku dhuftey ayaa cidhiidhigaasna dayr adag oo aan waligii dubin ku xidhi doona bi’idmi laahil kariim waxaase idinka la idiinka sugayaa oo la dinka baahan yahay in aad la socdaan wax kasta oo soo cusboonada isla markaana u diyaar garowdaan wax kasta oo arrintani keeni karrto waxaa la idiinka fadhiyaa in aad maanta muujisaan midnimada ay muujiyeen kuwaas gudaha ku nool waliba idinka oo jooga dhul xor ah oo warbaahintu xor tahay gaar ahaan waxa ay tilmamteydu si toosa ah maanta u bar tilmaamsaneysaa aqoonyahanka qurbaha jooga ee reer Awdal waxaa laga rabbaa in ay u badheedhaan sidda uu Dr. Ali Baxar mabdi’iisa iyo aragtidiisa ku sahabsan qadiyada Saylac ulla soo badheedhey ummadd baad aqoonteedii matashaan oo aad caqligeedii siddaan, haddaad wannaaga ugu hiilin weydaan Illaahey waa idinkula xisaabtami sidoo kale waa idinkula xisaabtamayaa haddaad xumaanta hoose iyo isku dirkooda amma kala jabintooda ka shaqeysaan dib isugu noqda adduunyadu waa afar maalmood Soomaaliduna waxey ku maah-maahdaa Waari meysidee war ha kaa hadho.

Wabilaahi Tawqiif
Abdirisaaq Mohamed Barkhad
Email:rasiiqi07@hotmail.com


This post has been viewed 138 times.

camud

Comments are closed

WARARKII HORE EE KU DHAAFAY HALKAN KA RAADI
Log in | onlined by SRH