Abdiraxmaan Saylci Siyaasadiisa Aargoosigu Ku Dheehantahay Oo Khashifantay Mudadii uu UK Socdaalka Ku Yimid.

Hadaba, iyada oo sobobta  aan maqaalkaa marka hore ugu qoray luqada ingriisku  ahayd oo kaliya sidii aan ugu wada diri lahaa websityo kala duduwan oo qaarkood luqada ingiriiska oo kaliya wax ku qoraan, ayaan waxan jeclaaday in aan si kooban marlaaad dadkaa iga codsaday ugu soo bandhigo  waxyaalihii Mudane saylici kasoo yeedhay mudadii uu ku sugnaa  dalkan ingiriiska.

Waxyaalahaa kasoo yeedhay Saylici oo aad looga hadal hayo meelaha la iskugu yimaado ee magaaladan London gaar ahaan galbeedka magaalada ayaa waxay  noqdeen waxyaabo beelaha qaar galisay shiki iyo in ay ka tanaasulaan daacadnimadii ay hore ugu hayeen walaalahooda aadka u taageersan Mudane saylici kuwaas oo u eg kuwo aanan habayaraatee runta usheegayn Cabdiraxmaan Saylici oo isagu u badheedhay kaladilka beelaha samaroon sidii uu kursi ugu raadsan lahaa.

Maqaalkan iyo waxyaalha kasoo yeedhay cabdiraxmaan saylci oo aan horayba u tilmaamay sida magaladan London aadka loogaga hadal hayo waxan kala tashaday in aan qoro dad aad looga tixgaliyo bulshada Awdal dadkaa oo aan waliba aad ugu mahadinaqayo sidii ay iigu dhiiri galiyeen in aan qoro maqaalkan.

Waxana keentay in aan haatan qoro maqaalkan iyadoo Mudane Saylici uu kadhoofay dalkan codsi ay dadkaasi igaga dalbadeen in aan sugo inta uu Saylici ka baxayo dalka sobobo iyagu ay ogyihiin awgeed.

Hadaba, hadaan u dhaadhoco ujeedada maqaalka iyo murtidiisa waxa jirtay mudadii uu Mudane saylici joogay carligan ingriiska in uu ula kulmayay dadka siyaabo hayb raadsiya marka laga reebo shirarka kulmiye ee officialka ah.

Hadaba, maalin maalmaha kamida ayaa waxa Saylici utagay sida ila aan aad ugu kalsoonahay ii sheegeen dad odayaal iyo dhalinyaraba leh oo runtii daacad ka ah jecelna wada dhalashada iyo wanaaga reer Awdal.

Dadkaa oo u badnaa dad magaca guud ee Mahadcase lawadaaga Mudane Saylici ayaa waxa ku jiray sadex nin oo kasoo jeeda beelaha kale ee Samaroon. Hadaba dhamaantood dadkaa malintaa utagay Mudane Saylci waxay ka midaysnaayeen danaha beelaha Samaroon laakiin waxay ku kala duwanaayeen siyaasada.

Si kastaba ha ahaatee waxa la kulankaa ay malintaa la kulmeen dadkaasi Cabdiraxmaan saylci kasoo baxay waxyaalo ilaa maanta laga hadal hayo magaaladan London iyo nawaaxigeeda.

Hadaan soo koobo waxyaalaha malintaa dhexmaray Cabdiraxmaan Saylci iyo dadkii sharafta lahaa ee booqday waxa kamid ahaa iyada oo uu nin kamida dadkii booqday Saylci uu waydiiyay su’aal. Su’aashaas oo ahyd “Bal waxa ay tahay isbadalka saylici iyo xisbigiisu doonayaan gaar ahaan marka laga hadlo Awdal.”

Hadaba, jawaabtii uu kabixiyay Cabdiraxmaan Saylci su’aashaa nadiifta ah waxay dadkii meeshaa iskugu yimid  ku riday naxdin iyo af kala qaad.

Saylci oo waqtigaa u haystay in ay dadka meesha iskugu yimid dhamaantood yihin dad kasoo jeeda Beelaha Mahadcase isagoo waliba meesha kadhex arkay labo nin oo ay raas wadagaan oo bahabar celiya kuwaas oo aanay dadkan kale marka hore isla socon laakiin ay kadinka aqalka uun ku kulmeen ayuu isaga oo isku kalsoon Mudane Saylci wuxu si badheedha u yidhi.

Isbadalka u horeeya ee aan rabo shaqsiyan anigu marka laga hadlayo Awdal waxa weeyaan sidii awooda Jibriilyoonis Awdal looga curyaamin lahaa.

Waxa kale oo uu Mudane Saylci halkaa ka cadeeyay isagoo faanaya in siyaasadiisa uu kula dagaalamayo Jibriilyoonis midhaheedii iyo nitiijadii ugu horaysay kadhalatay shirkii Burco oo uu sheegay in uu xisbiga kaga saaray Cabdiraxmaan Awcali oo uu kutilmaamay ninkii ugu ad adkaa jibriilyonis.

Waliba wuxu Cabdiraxmaan Saylici qirtay isagoo sii faanaya “in sifaha uu maayarka Boorama Cabdi Bile kuyimid uu isagu wax kulahaa, isagoo waliba sheegay in ay ninkaa “Abdi buur”kala figrad yihiin oo uuna doorbideen hadana maanta in uu ku qanacsanyahay mayar nimadiisa sobobtoo ah buu yidhi Mudane Saylici marabo in uu xakumo magaalada aan joogo doqon Jibriilyoons ahi.”

Intii aanu ogaan Cabdiraxmaan saylci in ay dadka uu lahadlayi yihiin dad kasoo kala jeeda beelaha samaroon oo aanay ku koobnayn kuwa naca iyo xinka ku taageera ee la qabiilka ah, wuxuu halkaa ka sheegay in aanay kaliya ahayn ujeedadiisu in uu Jibriilyoons awoodiisa curyaansho ee uu u socdo sidii “boqortooyo uu ku sheegay in Mahadcase uu ka xaday Makaahiil uu usoo dhicin lahaa..”

Hadaba, naxdinta meesha kadhacday maahayn oo kaliya ninka su’aasha waydiiyay laftiisu inuu ahaa qolada uu rabay Saylci in uu awoodooda katirtiro Awdal, laakiin waxa naxdin iyo afkala qaad ku yimiday dad badan oo daacad ahaa kana soo jeeday qabaailka sharafta leh ee mahadcase. Kuwaas oo tageersanaa daacadna ka ahaa  isbadal dalka kuyimaada iyagoo ujeedooyin kala duduwan cuskanayay.

Ka dib markii uu Saylci ogaaday in ay dadka meesha iskugu yimid ahayn oo kaliya dad qabiil ku taageersan ayuu isaga oo khajilaya iskana dhigaya nin kaftamaya ayaa waxa uu ku meeraystay oo uu yidhi “Dagaalka lafuhu maaha wax inaga reer AWDAL inagu gaar ah oo HABAR-JECLOBA waxay rabtaa in ay ka hoosbaxdo Oo ay iska xoreeyaan xukunka Habar-Awal.

Ugu danbayntii waxa laga yaabaa in ay jiraan dad badan oo reer Somaliland ah oo sobobo kala duwan u raba in uu maamulka dalka isbadal kuyimaado. Laakiin siyaasiyiinta danaha gaarka ah wata sida Saylci oo kale maaha in lasiiyo fursad umana qalmo.

Waxa waxlala yaabo ah waliba saylici oo ahaa siyaasi isaga uuni ismagacaabay ka hor intii aanu Gudoomiyaha Kulmiye dooran mudadii shirka kulmiye kasocday Burco in uu ku dhex faafiyo figradihiisa aadka u xun dadka walaalaha ah ee reer Awdal isagoo raba in uu qabyaalad ku helo taageero.

Cidii rabta xaqiiqada ama uu shiki ka hayo arimaha halkan aan ku qoray way ila soo xidhiidhi kartaa si aan uga qanciyo uguna faahfaahiyo meesha iyo goorta iyo uu saylici warkan kaga dhawaajay.

Cabdale Farah Sigad - London

Email: sigad12345@yahoo.co.uk