“Qofka Loo Jawaabayaa Aniga Maaha!!” Jawhar Qalinle

Run ahaantii ma jiro faraq u dhexeeya wiilka iyo gabadha marka laga eego dhanka qofnimada, oo gabadhuba way qaban kartaa wax kasta oo ragu qabto, walow imika ragaba ay ka badsadaan markaad eegto dalalka reer galbeedka.Laakiin waxa kala duwaya kaliya waa jinsiga(lab ama  dhedig)kaas oo  kala duwa shakliga guud iyo qaab dhismeedka jidhka ee qofka Sidaas darteed waxa jira wax badan oo ay isaga ekaan karaan.Sida:-magacda iwm.

Anoo udegaya dulucda hadalkeyga waxan akhriyey maqaal uu walaalkey Rashiid cabdi soo galiyey internetka kaas oo uu doonayey ínuu  jawaab kaga bixiyo maqaal aan horey u qoray.Hadaba ujeedadeydu maaha inaan ka hadlo jawaabtiisa sababtoo ah qofka uu usoo jawaabayba aniga maaha. rashiid wuxu usoo jawaabay gabadh, marka laga taamilo qaato weedhaha uu ku bilaabay hadalkiisa.

Balse waxan doonayey oo kaliya inaan isaga u sheego in  maqaalka uu ka jawaabayey aan anigu qoray anigana magaceygu yahay Jawhar cabdisamad qalilnle.Akhristayaasha kalana waxan usheegi lahaa iney sidaa ula socdaan.

Waxa suura gal ah in Rashiid lumiyey waxbadan oo uu ka oran lahaa qoraalkeyga amaba ay jiraan akhristayaal kale oo fikirkooda iska liqa taasna ay sabab u noqotay ka dib markey magaceyga ukala saari waayeen wiil iyo gabar midka sita, iska dulqaata waayo magacdeenaa carabi u badan.

Magaceyguna wuxu ka midyahay magacaan badan oo ay bahwadaag yihiin kuwa haweenka, sida ka dadyawga kale ee dunidaba ay u jiraan magac ay share gareeyaan wiilasha iyo gabdhuhu.

Dhinaceenana waxa jira magac badan oo illaa xad isku dhaw, qoraal ahaan iyo dhawaaqa intaba iyo qaar aan waxba kukala duwanayn oo isku mid ah.

Waxa la kala saari karaa oo kaliya marka la ogaato  qofka magaca sitaa midka uu yahay wiil iyo gabar.

Tusaale:

Shukri   iyo shukri
Hanad   iyo Hanad
Farxaan iyo Farxaan
 
Hadaba magaceygu wuu ka duwanyahay qoraal ahaan iyo dhawaaq ahaanba, oo marka gabadha loo bixiyo wuxu iska bedelaa dhexda ama gadaal baa laga raaciyaa  shaqal sida magac badan oo aad halkan ku arki doontaan.
 
Tusaale:
Rashiid  iyo   Rashiida
Jawhar   iyo  Jawaahir
Xasan     iyo   Xasna
Aniis      iyo   Aniisa
Dhuux    iyo   Dhuuxo
Khadar    iyo  Khadra
Foosi      iyo  Foosiya
Aadan    iyo  Adna
Muumin  iyo  muumina
Deeq      iyo  Deeqa
Nuur      iyo   Nuura. iyo qaar kaloo badan.
 
Ugu danbeyntii  akhristayaasha sharafta leh waxan ku dhaafayaa sidaa iyo barasho wacan. Wabilaahi towfiiq
 
Jawhar Cabdisamad Qalinle
Email: korwaayeel@hotmail.com